Молитва Великаго Василия

«Заклинаю тя, злоначальниче хульный, начальниче отверженный, самодетельниче лукавый! Заклинаю тя, отверженнаго от вышния светлости и во тьму глубины низведеннаго за гордость! Заклинаю тя и всю спадшую ти силу в след твоея воли! Заклинаю тя, душе нечистый, Господем Богом Саваофом и всеми воинствы ангельскими Божиими: изыди, отъиди от создания сего! Заклинаю тя Богом-Словом, Единородным Сыном Его, рожденным от Него прежде векъ; неизглаголанным и Святым Духом, исходящим от Него, иже сотворившим видимую тварь и создавшим человека по образу рукою своею и по подобию, и словесем животным, исполнившим и вселенную писанием, первее род всяк научившим и писанием на путь истинный волею наставльшим, и ангелом приставлением сохранившим, и потопльшим водою свыше, и поднебесныя бездны наводнившим, и исполни нечествовавшая погубльшим, и столпов скверных стрясшим, и землю Содомскую и Гоморскую огнем Божиим исполнившим, его же свидетель – дым, не угасая, курится, и разделившим море жезлом, и люди своя немокрыми стопами проведшим, и мучителя Фараона и воя Богоборца в веки волнами погруждшим и языки иноплеменники потребльшим, и законы нечестия разрушившим брани, и воплотившимся от Марии девы, напоследок неизреченно ти печати чистоты сохранившим и изволившим крещением омыти ветхую скверну, нашим же есми преступлением осквернилися, и погружением нас от грех омывшим. Заклинаю тя Богом, крещшимся во Иордане и образ нам чистоты подавшим, в воде погруженным, емуже ангели и вся силы небесныя удивишися, воплощаема Бога видяще, смирившася и Божественное свое существо скрывша, от нижняго же безначальный Отец собезначальное Рождество открый и Святаго Духа сшествием Тройчное естество свидетельствова. Заклинаю тя Богом, запретившим ветром и волнение морское укротившим, и прогнавшим бесов множество, и зеницы очию из чрева ослеплене и брением слепому зрети сотворившим, и первый рода нашего создания образ нам обновльшим. Заклинаю тя Богом, давшим хромым ходити и течение крови без числа затворшим, и отрясшим проказы от струпным3), и мертвыя из гроб источити сотворшим, беседовавшим нам страстьми до гроба, и ада испровергшим воскресением, и все человечество не объято смертию устроившим. Заклинаю тя Богом, всех и вся исполнившим, и Богом безсмертным, везде сущим, от Того бо трепещутъ4), Того убоятся, егоже вся ужасаются и трепещут, и боятся, и отступают. Заклинаю тя Богом вседержителем, божественный свой Дух вдохнувшим в пророки и апостолы, поспешествовати, и всю вселенную благочестия наполнившим: убойся, бежи, отъиди весь, о, бес нечистый, злый, сильный, преисподнии глубина и лживый блазном, льстивый, необразный и многообразный, видимый безстудия ради, невидимый лицемерия ради; идеже аще еси и отонюдуже аще идеши, или сам еси, Вельзауле, князь бесом, или невидим, или горд, или животным привидением являяся, или змиевым образом, или звериным лицем, или яко куреньем дыма некоего являяся или яко огнь изменяяся, или привидением являяся мужеским полом и женским, или гадом, или птицею, или нощию глаголя, или слух страша, или претекий, или творяся в свете, или во сне, или в спании тяжце, или в язве, или в болезни, или в слезах похотных, или на смехы пущая, или пустошен или похотен, или идолеск, или чары любя, или на похоти неистов, или зведочтец, или чаром обретать, или пиянством обре и кровем, и мятежем творец, безстуден, ревнив, нестроен, с луною ся переменяя, или со временем неким превращаяся, или наутрия, или на полудне, или в полунощи, или в безгодия некая, или заутра, или прилучением ся еси утолкл, аще еси послан к ним, или приближился еси внезапу, или из моря, или из рек, или из брег, или из кладязя, иля из рова, или из озера, или из тростия, или изъ-под земли нечистыя, или из леса лужнаго, или из древа, или из птицы, или из грома, или из града, или из молния, или из основания храмины, или из покрова баннаго, или из купели водныя, или из гроба идольскаго, или отнюдуже вем и не вем, от знаемых и не знаемых, и от не посетимаго места – отлучися и изменися, устыдися образа, образованнаго рукою Божиею, убойся воплощеннаго Бога, уподобися и не укрыйся враг Божиих (имя), ибо жезла гнева Божия и пещ огненная, и преисподняя, и скрежет зубный, прещение ослушания ждет тебе; убойся, бежи от мене и не возвратися ни един, ни со иными злыми духи нечистыми, но отъиди на непроходную землю и на безводную, и не деланную, на нейже человек не живет, Бог же един призирает, связая и вся прельщающия его образ, и совещавающия, и узами во тьме преисподней связав тя, всему злу диявола, и долгую нощ и день посади тя и заключи, яко велий страх Господень и велия слава Его, и вся работна Ему, Отцу и Сыну, и Святому Духу, ныне и присно, и во веки веком, Аминь».